يوسف بك ..سيد الخشبة والمسرح ..شيماء محمد 

يوسف بك وهبى قالها…وسمعناها ياما كتير ..الدنيا ما هى الا مسرح كبير…وكل واحد فينا وشطارته ..يا يمثل يا يخرج ..يا يكتب.. يا ينتج …او ينسق حتى المناظر…
 وفيه الكومبارس الصامت..اللى بيزينوا بيه المشهد ويقولوله…احمد ربنا اننا ادناك الدور..
ويحمد ربنا ويقف ثابت ..اصل كلمة اكشن بترعبه ....وفرحة قلبه بعد ما يخلص المشهد بتغلبه...وفيه الدور الرئيسى ..يا بخته نجم النجوم ..اللى بدخوله خشبة المسرح تتزلزل  وتنزل عليه الكاميرا بالزووم ..ومش مهم المحتوى ..المهم انه بيجى للجمهور على الهوى ..

اما المنتج وده ماله …بيه وكل اللى بيفكر فيه ازاى بيزود ماله..ويشغل باله ليه ..باللى هيغنى ولا اللى يرقص ولاحتى اللى  بيقول الأفيه ..و دايما بيسيب اللى بينسق ويظبط الديكور…يركنه على جنب لان خلاص مبقاش ليه دور..وهو ده ينفع أو يجوز ..ان اللى يتعبوا ويجروا ويظبطوا ..يقعدوا يتفرجوا فى الاخر على الاراجوز..والمهم انت عندك موهبة ..هتطلع على الخشبة ..والموهبه هنا مهارة ..وناس لا وناس اه بتتمتع بيها بس الحظ يا خسارة..
ويا بختك بقى لو انت المخرج ..اللى فاهم ودارس المشهد.. وبشطارته الكل يشهد..يعرف يحرك جميع الاطراف… ويحاول دايما أن فى نهاية المسرحية ..الكل يشهد له بالاحتراف..

وهنا بفكركم وانا اولكم ..مين اللى كاتب ومين اللى بينتج ..ده مش بايدينا ..بس تبديل الادوار ..عمره ما وقته هيروح علينا..لان ربنا رب قلوب ..وصحيح علم الغيب عنده مكتوب…بس انت تقدر ومتكونش على امرك مغلوب..
فحاضر وطيب ..كلمتين بس انت صاحب القرار ..وقلنا قبل كده متخليش السيادة لأى فار..وخلى دايما المسرح فى أمرك يحتار ..تنسق وتبدع ..تمثل وتشعر ..ان شاء الله تقوم بكل الادوار..ولو فيه مشهد مش بتاعك او ليك…اقعد واتعلم ممكن ده فى يوم اللى يقويك ..ومش مهم نهاية المسرحية ايه…بالنسبه لك مش دى القضية يا بيه..المهم فى النهاية دورك فيها كان ايه...؟؟