الكافر المتقدم والمؤمن المتخلف

الكافر المتقدم والمؤمن المتخلف
——————————————

في رحلة العمرة منذ أيام وقبلها رحلة الحج العام الماضي 2023 رأيت كما يرى الجميع ، الناس تبتهل الى الله بالدعاء أن يخلصهم مما هم فيه ، كل واحد بيشكي همه وبيطلب من ربنا انه يوفقه ويسدد خطاه ويرفع مقته وغضبه عنه ، وهذا شيء طيب لأن ربنا قال "أدعوني استجب لكم".
#حكاوي_علام
فى الأيام الأخيرة من رمضان الدنيا كانت زحمة وكأننا يوم الحشر ، بالظبط زي يوم عرفه ، والجميع يطلبون من الله غفران الذنوب والتوفيق ، وبرضو كل واحد بيشكي همه لله ، وبيوعد انه تاب عشان يرجع صافي نقي خالص من الآثام ، عشان يرجع يرتكب تاني نفس الذنوب ، بس على نظافة .
#حكاوي_علام
من بين الدعوات اللي سمعتها من ناس كتير ان ربنا يسخط الغرب الكافر المتغطرس المسيطر على العالم ، وان ربنا يخلصنا منهم لأنهم طابقين على نفوس البشر وخاصةً المسلمين المؤمنين الموحدين الأبرياء اللي مفيش زيهم ، وبعد الانتهاء من الصلوات والدعوات والابتهالات ، كله بينزل يتسوق ، يعني يروح المسلمون الموحدون يشتروا موبايلات صنعها الغرب الكافر ، ويركبوا عربيات صنعها الغرب المتغطرس ، وينزلوا في فنادق 5 نجوم لأنها تدار من خلال شركات غربية كافرة ، ودا لأنها بتقدم خدمة متميزة غير الخدمات الغير ادمية اللي بتقدمها الشركات المسلمة المؤمنة الطاهرة .
#حكاوي_علام
والموضوع ممتد طول الوقت ، يعني شغالين نقمة ودعاء على الغرب الكافر في كل وقت ، ومش عجبنا لا اسلوبهم ولا طريقتهم ، بس نحب نسافر هناك ونعيش الحياة الآدمية اللي كلها حرية ، وكمان نبعت ولادنا يتعلموا هناك عشان جودة التعليم مفيش زيها في بلاد المؤمنين الأطهار ، وبنجري نشتري سياراتهم الفارهة لأن عوامل الآمان فيها مش موجودة فى العربيات اللي بتتصنع محلياً ، لان مكوناتها مغشوشة .
#حكاوي_علام
معظم شيوخ الوهابية اللي ساقوا الناس وراهم وشحنوهم بالعداء للغرب الكافر ، عندهم بيوت في امريكا وانجلترا والمانيا وكندا ، ولما بيروحوا هناك بيلاقوا تقدير كبير ليهم ، ورغم كده الدعاء عليهم مستمر وواخدين معاهم القطيع اللي خلاص اتشبع بضرورة الحجاب وان مشكلة الاخلاق والتدين السليم مرهونة بتعطية الشعر وعدم لبس قصير الثياب ، ونسيوا يقولوا للناس ان التقدم فى العلم هو اللي بيخدم البشرية ، وان التعليم الجيد هو اللي بيخلص الناس من فقرهم ، وان المساعدات اللي بيقدمها الغرب للدول الفقيرة عشر مليون ضعف ما تقدمه الدول الاسلامية الغنية ، ونسوا كمان يقولوا ان ربنا قال" وقل اعملوا"، عشان بالعمل بس تتقدم الشعوب والأمم ودا اللي حصل فى الغرب ، ونسيوا كمان يفهموا الناس ان الغيبة والنميمة اشد عند الناس من تارك الصلاة ، وان الله لا ينظر لصوركم ولكن ينظر لقلوبكم واعمالكم ، والاعمال دي يعني التقدم فى الطب والصناعة والزراعة ومساعدة الغير .
#حكاوي_علام
ورغم ان الناس بتحج وتعتمر من 1445 عام ، وما يصاحب ذلك من دعوات وابتهالات ، ورغم كده واقعهم لم يتغير ، يعني تلاقي المصريين والعرب والافارقة هما اكتر الناس دعاء ، وحياتهم هي هي مفيش حاجة اتغيرت ولا هتتغير ، لأنهم فاهمين الدين غلط وان ربنا مبينضحكش عليه .
#حكاوي_علام
ومبينضحكش عليه دي ليها قصة ، في احد المرات منذ عدة سنوات كنت بصحبة زملاء لأداء العمرة ، وطول ما احنا فى مكة كانوا رافضين الكلام ومناقشة أي امر ، ليه؟، عشان مشغولين بالعبادة والبيت الحرام وان دا موقف عظيم ميصحش نتكلم فيه غير عن الحلال والحرام ونصلي وبس ، وبمجرد العودة وطيلة ساعات العودة هاتك مسك سيرة فلان وتقطيع علان والاستعداد للايام الجاية اللي هنرتكب فيها موبيقات من جديد ،،، وللاسف دا الفهم الغير مفهوم بالمرة ، بدل ما نتعلم السلوكيات الصحيحة اقتصر الفهم على طريقة تأدية العبادات وبس ، يعني دعنا نودع ذنوب الماضي ونعود لارتكاب ذنوب اخرى من جديد .
#حكاوي_علام
كل دا بيلخص ليه الغرب الكافر المتغطرس متقدم ، وليه ربنا واقف معاهم وبيساعدهم وبيعاونهم ، مع انه فى الظاهر مش عاوز يساعد الفقراء ولا يخلص فلسطين من نكبتها ، ولا يصفي النفوس وكل واحد يعيش فى حاله ، مش قادرين نستوعب ان رسالتنا اللي ربنا خلقنا عشانها اننا نعمر الارض بالعلم ونتسلح بالمعرفة ، واننا ندي الحرية للباحثين ، واننا نسيب كل واحد فى حاله ، وان كل واحد بياخد حقه تالت ومتلت بقدر عمله واجتهاده .
#حكاوي_علام
فهم الكون مش عاوز نظريات ولا عاوز محللين ولا هو لوغريتمات عاوز عالم رياضيات يفكها ، كل الحكاية شوية فهم ، وان الغرب الكافر بيشتغل على قواعد الدين الصحيحة ، افعال مش اقوال ، واحنا اللي اعترفنا ومعترفين بكده لما علماء المسلمين سافروا وقالوا : رأينا فى الغرب مسلمين بلا اسلام ، لكن عندنا اسلام بلا مسلمين ، عندنا كلام وبس ، وان الغرب تفوق وتسيد عشان احنا شوية متلقين فقط ، مبنعملش اي حاجة غير التلقي فقط ، يعني هما يصنعوا العربيات واحنا نشتريها ، يصنعوا الطائرات واحنا نركبها ، يصنعوا السفن واحنا نسافر بيها ، يعملوا تعليم كويس واحنا نبعت ولادنا يتعلموا هناك ، عملوا حرية عشان كده كلنا عاوزين نسافر نعيش هناك .
#حكاوي_علام
وفى الوقت اللي بيحصل كل ده، احنا مستمرين ندعي عليهم ونشتمهم ونقطع فيهم، وهما متقدمين واحنا متأخرين ، لأنهم مش مشغولين بدعواتنا ومستمرين في عملهم ، ولو كل واحد انشغل بحاله وعمله ، وخصص الوقت اللي بيدعي فيه على غيره ، عشان يبقى زيه ، اكيد هيبقى احسن وافضل منه .

#حكاوي_علام #عثمان_علام