كــارم محمود لــ"المستقبل البترولــي"شبكة الغاز في "جاسكو"هي شريان الحياة في مصر.

تعتبر شركة جاسكو هي شريان الحياة في مصر، فأكثر من ٧ آلاف كيلو متر مربع هي أطوال شبكة الغاز منتشرة في كل ربوع مصر، تنقل الغاز لكل بيت ومصنع وشركة ومخبز ، لاحياة ولاتنمية ولاطاقة من الاساس إلا من خلال هذه الشبكة التي تديرها وتقوم عليها جاسكو...وكان من حسن الطالع أن اولى المهندس كارم محمود رئاسة الشركة منذ امثر من عامين ، وسبب ذلك أنه من القيادات القليلة التي تؤمن بأهمية العنصر البشري، فهو يرى أنه اساس التقدم وأساس كل شيئ إيجابي إذا ماتم إعداده إعداداً صحيحا...وقد يضيف هذا الفكر لجاسكو قيمة اخرى بخلاف انها القائمة على الشبكة...ماذا عن خطة الشركة خلال المرحلة المقبلة وكيف استعدت لإستقبال إنتاج الغاز المستقبلي وماهو منهج كارم محمود في رفع مستوى البشر في الشركة..كل هذا وغيره في هذا الحوار ، وإلى النص::

مُجمع غازات الصحراء الغربية فخر لكل مصري وصناعة القيمة المضافة قائمة عليه.

• س- ما هي أخر التطورات في جاسكو وماذا عن مجمع غازات الصحراء الغربية؟

عرضنا نتائج الجمعية ونتائج الأعمال السابقة كلها والفترة القادمة ،وانا بتكلم عن مجمع غازات الصحراء الغربية كله بصفة عامة لأنه عنصر أساسي ،وهو وحدة اقتصادية لها اسهاماتها فى الدولة ،لأنه بيطلع 650 ألف طن غاز فى السنه ،وهذا الإنتاج يذهب للسوق المحلى ويمثل ثلث الإنتاج المصرى ، ثانياً نحن نصدر البروپان وهو مصدر العملة الدولارية التى تدخل الدولة ، وهذا عن طريق تسديد قروضي او بعطى جزء للهيئة لتلبية مطالبها التجارية التجارية فهذا مصدر للعملة الصعبة الذي تعانى منه الدولة حالياً فى نقصها، ولما تطلع 350 ألف طن فى السنة وتصدر للخارج بيكون شيئ رائع.

• س- لكن الأسعار إنخفضت؟

طبعاً لأنها كانت 800 دولار للطن النهارده بنتكلم على 270 دولار للطن ، وقد ارتفع بعض الشيئ ولكن مازالت الاسعار قليلة عندما تقارن بال 800 دولار ب 270 دولار ،الفرق مازال كبير ،لكن لو رجع تانى هيفرق معانا وهيفرق مع إقتصاد البلد نفسه..ثالثاً ان صناعات البيتروكيماويات قائمة على المادة الخام مثل الإيثان والبروبان ، وهذه مشتقات تذهب لصناعة البتروكيماويات، وهناك مصنعين اتعملو "إيثدكو وسيدبك "بالإضافة لشركة البتروكيماويات المصرية ، وتلت مصانع البتروكيماويات يأخذون المادة الخام من جاسكو ...وهذه المصانع اتصرف عليها مليارات ، ايثدكو لوحدها 2 مليار دولار ،وبدأت العمل فى شهر مارس 2016 وهي تنتج البولي أيثلين والإيثلين ، وتصدر منه جزء وتترك منه جزء للسوق المحلي ،وهو أصبح معتمد بشكل كبير على هذه المنتجات ،وطبعاً جاسكو هي التي تلعب هذا الدور كوحدة اقتصادية ولها تأثير كبير جداً على السوق المصرى سواء فى سوق البيروكيماويات او في سوق الغاز الذي يذهب للدولة ، وكلما الإنتاج زاد كلما قل الأستيراد ،لأن السوق المحلى يحصل على الجزء الأكبر من الإنتاج وبسعر مدعوم للهيئة ، كما ان العملة الصعبة التي اجلبها من الخارج تدخل السوق المصرى ،ولذلك كان لابد من التوسع فى هذه المشروعات والإستفادة من استخراج هذه المشتقات ، وأنا بحاول بقدر الإمكان ان اتوسع فى مشروعات كبيرة لأنها منتجات إستراتيجية لها اهميتها ،وابتدينا ندخل فى ثلاث واربع مشروعات حتى تزيد القيمة...ولدينا مشروع جديد سيزيد من انتاج الإيثان الذي يذهب للبتروكيماويات ،و بتروجيت تنفذه ،وسيبدأ العمل فى شهر 5 بتوسعات جديدة ، وجاسكو عملت المشروع على نفقتها الخاصة حتى نؤمن ل" إيثدكو احتياجاتها من الغاز ، وهذا سيؤدي الى زيادة إنتاج البروبين لأنه هيزود الخليط وهيزود البروبين المصدر للخارج ،وعن طريقه هزود العملة الصعبة ،وفيه تعديلات اتعملت هتزود من انتاج هذه المشروعات ،وحالياً شعالين ،وفيه فى مشروع مستقبلى بنفكر فيه وهو هيزود حوالى 1000 طن ،وفيه مشروع بندرسة مع شركة أسبانية هي التي عرضت تعمل دراسة الجدوى للمشروع وإمكانية تمويله وهو عمل وحدة إنتاج جديدة هتزودلى حوالى ألف طن ، والمشروع ده هيتكلف من 500 ل 600 مليون دولار وعملنا مع الشركة الأسبانيه مذكرة تفاهم وهيا بتدرس شكل المشروع ، والتوسعات هتزود انتاج اد ايه ، وثانى حاجه سبل التمويل ،لأنه عارض تمويل المشروع والمشروع هيزود 1000 طن زيادة لما يتنفذ ،وهناك حقل فى الأسكندرية جديد و هيطلع 450 مليون قدم مكعب يومياً اسمه "ريفن "ونحن نجحنا مع إيجاس بأن الغاز مجرد خروجه من البحر يوصل عندنا فى المجمع.نسعى لتوزيع عادل لحصة الغاز مع المصانع وحرام مصانع الأسمنت تشتغل بالغاز.

• س-هذه الزيادة تمثل كام من إنتاج الغاز الذي يدخل الشبكة؟

عندي زيادة في الإنتاج إنشاء الله 450 مليون قدم ، وانا بيدخلى 900 مليون ،يعنى انا بدخل 50% من الأنتاج الموجود عندى زيادة ، وهذا سيعوض النقص فى المستقبل نتيجة التقادم ،بل بالعكس سيكون هناك زيادة ، وهذا مشروع جديد شغالين فيه وسينتهي فى 2019 ، وهناك خط بيتعمل عشان الغاز الى هيوصل ، وبعمل رافع لضغط دخول الغاز وهبتدى استغل الغاز ونستخرج منه هذه المشتقات وهذا سيكون له أهمية كبيرة أن شاء الله ، وبهذا انا بحافظ على أنتاج المجمع لعشر سنوات قادمة وضامن المنتجات الى طالعه منه من غاز او بروبان وكمان اضمن بإذن الله ان شركات البتروكيماويات تبقى شغالة بالطاقة الكاملة إن شاء الله لمدة 10 سنين وده الفكر اللى بنشتغل عليه .

• س-هذا يعني تواجدكم في أي مكان به غاز؟

أينما وجد الغاز تواجدنا نحن لأن الغاز لما بيطلع له مشتقات زى البترول بتطلع منه البنزين والسولار ،والغاز كمان بيطلع منه بروبان وجاز وخليط الأيثان وبنطلع منه كوندنسيت وده اسمه المتكثفات ، وهذا يضاف على الزيت الخام في معامل التكرير عشان يطلع منها منتجات ،وانا عندى التسهيلات موجودة ، وبها استطيع اخد الغاز واطلع منه هذه المشتقات وفى الأخر يتبقى غاز يذهب للشبكة ، بعد أن نكون اخذنا منه القيمة المضافة .

• س-ماذا لو تم إكتشاف نسبة غاز كبيرة فى الصعيد هل ستنشأون وحدة معالجة هناك؟

ممكن نعمل ونستخلص مشتقاته ،ولكن يجب ان تكون الكمية المكتشفة كافية لأنك بتعمل إستثمار جديد وضخم واقل مشروع بحوالى بمليار دولار ومش هنعمل إلا لوكانت كمية الغاز كافية وفيها جدوى من المشتقات التي سنأخذها من الغاز ، وبنعمل دراسة جدوى ونشوف إمكانية تنفيذه ولكن احنا بنحلم بصراحة أن يكون هناك إكتشافات زى كده ونطلع منه القيمة المضافة .

لابد من البحث عن مصادر بديله للطاقة وسعيد بقوار الرئيس لإنشاء محطة الضبعة.

• س-تتحدثون عن القيمة المضافة كثيراً فهل المستثمر يحصل على الغاز بالسعر العالمي ؟

هو طبعاً لازم ياخده بالسعر العالمي ،لكن لو أخده بالسعر العالمي وصرف عليه هل هيكون مناسب ولا مش مناسب لأنهم لو أخدوا بالسعر العالمى وطلع منه منتجات وأضاف عليه التكلفة هتكون المنتجات بسعر عالى وهتكون مش منطقية، فعادةً الذي يكتشف الغاز بتكون الشركات الأجنبية انا مبدورش ولا ابحث ليه عن إكتشافات لأنها مكلفة جداً وبصرف مليارات فى حفر الآبار وياعالم هلاقى او مش هلاقى ، لكن هو عنده المقدرة على البحث وهو مبيتحكمش فى سعر لأنه بيكون فى أتفاق سعرى بينى وبينه لأنه عادةً بيكون فى شراكة بينى وبينه ،بمعنى أنه لو أكتشف حقل طبقاً لأتفاقيه معمول بها وتنص على انك انت مثلاً لك 25% وانا لي 75% والنسبة بتاعته سيبيعها لي ونتفق على سعر الغاز ،لأنى بدخله على الشبكة هو الخلاف الى بينى وبينه بيكون فى إنخفاض أسعار الدولار وكمان الأكتشافات فى المياة العميقة وبتكون مكلفة جداً وبنتفق على أسعار جديدة حسب تكلفته هو ونتفاوض حتى نصل لسعر مناسب.

• س-لماذا تم تخفيض سعر الغاز لمصانع الحديد؟

اتخذ بالفعل قرار لكنه لم يطبق ، وكان قرار وزير الصناعة والحكومة ساندتهم شوية،بحيث يقلل سعر الغاز لمصانع الحديد ولكن حتى الآن لم نطبق هذا القرار .

• س-لماذا لاتفتح مصر استيراد الغاز للقطاع الخاص؟

موقع مصر متميز جداً ،ونفسنا نستغلة كويس ونكون احنا تاجر الغاز ، وانا ممكن انتج غاز وابيع واستقبله من هنا وابيعه ومن هنا وابيعه ،انت عندك بحر أحمر مع متوسط مع خليج تقدر تستورد من البحر الأحمر وممكن من الخليج ،احنا ممكن نعمل الأيثان ونصدره لأوروبا ، وعندنا بنية أساسية مش موجودة فى أوروبا ولا فى الشرق الأوسط .

• س-كم يبلغ طول الشبكة التي تقوم عليها جاسكو؟

لدينا شبكة 700 كيلومتر ومصنعين إساله ، وهذا كنز وجوهرة ، لأنه عندما المقومات التي تجعلنا نعمل كده ، ولو علاقاتك السياسية كويسة ممكن نجيب عاز من إسرائيل و نسيله في مصدر ونصدره ، ونجيب عاز من قبرص ونسيله ونصدر ، ولدينا مواني إستيراد الغاز وتحويله للصورة الغازية ،هات وطلع من عندك وبيع ..لكننا لانفعل ذلك لأننا محتاجين نخرج من الأزمة ، فيه ازمة وفجوة بين الإنتاج والأستهلاك لأن الإنتاج حالياً مش مغطى وبتستورد عشان تغطى الأستهلاك لتغطية ، وعشان كده لازم يكون عندك وفرة ،بمعنى ان يكون عندى غاز ممكن اسيله بسعر غالى شوية من اوروبا وممكن نجيب من اماكن تانيه قريبة وعندها غاز بسعر رخيص ، مثل ماليزيا.

إسكادا يتحكم في الطاقة في مصر وهو عين البترول على البلد. 

س-هل يوجد تفاوض فى هذه الناحية؟

انا معنديش فكرة بصراحه لأن هذه مسائل سياسة والوضع الحالى للبلد لايسمح ، لكن لو عشان البلد انت زي ما بتاخد سلاح من أمريكا ومن روسيا فاخد الغاز من إسرائيل وهيا عندها تلت حقول كبيرة هيا محتجالك وانت محتاجها هيا مش عارفه توديه فين فانت تاجر وعظم القيمة المضافه عندك وفى مفاوضات مع قبرص نستورد منها ونسيل الغاز ، انا حضرت قبل كده حضرت مع المهندس شريف عندما وزير بترول وذهبنا الأردن وقابلنا وزير النفط الأردني وكان فى اتفاق اننا نمد خطوط بحيث نأخذ الزيت منهم نجيبه مصر ويتكرر فى مصر ونصدره من خلالنا إلى أفريقيا ،وهستفيد من العملة عن طريق استيراده وتصديره لحسابهم ،نفس الحاجه فى الغاز نستورده ونسيله وأبيعه ..القضية تحتاج الجو السياسى بين الدول يتحسن.

• س-كيف استعدت جاسكو لحقل ظهر ؟

الحقيقة حقل ظهر هو اكبر حقل مكتشف فى مصر وهيبدأ فى الأنتاج فى 2018 ، و هيبدأ ب 700 مليون ، وإنشاء الله على عام 2020 هنوصل ل 2700 مليون قدم مكعب ، النهارده أنتاجنا 4.5 مليون قدم مكعب وبكده هيدخلنا أكتر من 50% .

• س-ألا ترى أن هناك خطأ كبير في إستخدام الغاز لتوليد الكهرباء؟

خطأ مصر منذ البداية أنها تعتمد على مصدر واحد من الطاقة وهو الغاز وكان فى توقعات كبيرة أن مصر هيكون فيها أكتشافات كبيرة جعلت الكهرباء تعتمد على الغاز، ولأن الغاز هو أنظف وسيلة للطاقة وكانت الخطط تبنى على إننا محطات حرارية غازية واحنا اهملنا المحطات وبدأنا محطات رياح في الزعفرانه ودى بتطلع طاقة ضعيفة جداً ومدخلناش فى أى طاقة ، وانا قرأت تقرير أن ألمانيا 50% من طاقتها من الطاقة الشمسية والصين بتطلع طاقة من الفحم ،والألمان عشان قطعوا شوط طويل فيه وتبحرو فيه لكن عندنا هنا فى مصر هو الغاز وبعض المحطات بالسولار والسولار ليه مشاكل نقله إستيراده، وهو كمان غالى وهو منتج تقيل ومحتاج سخانات ،لكن لابد وان نتجه للفحم والطاقة الشمسية ، ومحتاجين نركز فيهم ، والفحم ده موجود بكثرة فى العالم ، وبالنسبة للنووى رأى الشخصي انا كنت سعيد جداً لما أعلن الرئيس السيسي عن إنشاء المحطة النووية فى الضبعة ،وبصراحه الرئيس هو من أهتم بالموضوع ده وأحنا كنا محتاجين المحطة دى جداً لأنها محطه هتضيف كهرباء وسهلة التشغيل و نقدر نشغلها ، لأننا مشغلين مصانع إسالة غاز أخطر من الطاقة النووية بكتير وشغالين فيها كويس ، ولابد ان يكون هناك تنوع لمصادر الطاقة حتى لو هيكون عندنا غاز لأننا سنستخدمه فى القيمة المضافة ...ودلوقتى انت بتطلع سماد من الغاز ووقود للعربيات وبوتاجاز وبتطلع منه بيتروكيماويات ، والغاز دخل في كل حاجه حتى الخشب .

العنصر البشري أهم من أي استثمار وبرامج طموحة للتدريب والترقي. 

• س-أحياناً المصانع تشتكي من قلة الغاز لماذا؟

فى بعض الأحيان بيكون فيه توقف فى بعض الحقول وساعات بعملهم جدول زمنى للتوقف وخاصةً ً فى الصيف لأنه فى الصيف مش مسموح مثلاً حقل الأوبيض ده توقف وهو بيدينى 400 مليون قدم فى اليوم ، فلازم يقف اسبوع صيانة كل ده بيأثر علينا لأن كل الى طالع مكفيك فلما يتوقف حقل زي الأوبيض ده بيفرق معايا ، ولدينا قائمة للأولويات مثلاً الى هيأثر على الناس الكهرباء يبقى ليها الأولوية ، وبنحاول نعمل توافق بين المصانع وحسب الأحتياجات ، لكن انا شغال بجدول وهذه ظروف.

• س-مصانع الأسمنت هل تحصل على الغاز؟

 بصراحه حرام أدى مصانع اسمنت غاز ، هذه مصانع لاتخرج سوى التراب فكيف امنحها غاز؟؟؟ ،وللاسف كانت غلطة كبيرة اننا اعطينا الغاز لمصانع الطوب.

• س-ماذا عن مركز تحكم جاسكو؟

هو معروف بأسم إسكادا وهو مركز للتحكم فى شبكة الغاز داخل مصر كلها وهو بيكون موضح كل المستخدمين للشبكة سواء محطات او مصانع وفيها كبار العملاء.

كل الموظفين زعلانيين علشان عاوزين يتدربوا ويؤهلوا عكس ماكان معمول به سابقاً.

• س- هل هناك جهات تستعين بالمركز؟

طبعاً الوزارة لأنه مركز التحكم فى الطاقة فى مصر بالكامل ،فهو عين الوزارة وهو الى بيدير منظومة الطاقة فى مصر بالكامل ، فكل الشركات و الوزارة مربوطة ،كمان هو ينظم عملية التشغيل بالكامل انا ..عاوز أقول حاجه الشبكة بتاعتنا 7500 كيلومتر مش موجودة فى الدول الأوربية مفيش شبكة بالحجم ده فى أوربا ،وأنا بستغلها الأستغلال الأمثل للكميات المتاحة ،يعنى شبكتى هنا بضخ فيها 150 مليون متر مكعب وهي قادرة انها تستوعب كميات إضافية، هذا إضافة للخطوط الجديدة التي نشأها ،وإنشاء الله نتوسع فى الخطوط نفسها،و احنا بنزود متر زيادة ده عشان المحطات الجديدة والأكتشافات الجديدة ،لأن الفتره الى جاية هناكحوالى 5 محطات جديدة .

• س-ماذا عن العصر البشرى في جاسكو؟

نحن نطمح الى تطوير العنصر البشرى عشان يواكب العصر ، ولازم الناس تؤهل علمياً للإدارة في وظائفهم من خلال التأهيل الفنى والتأهيل الإدارى ، وهذا كان مهمل فى مصر بالكامل،و التأهيل الإدارى أزاى تبقى مدير و تدير الناس الى عندك عشان تطلع منهم إنتاج ،فعملنا ده وعملنا معايير للترقى ، وقلنا مينفعش حد يترقى لإدارة عليا من حتى يؤهل إداريأ ، بمعنى أنه بياخد دورات فى الإدارة واللغات ولازم يجتازها بنجاح قبل ان يكون مدير عشان يعرف يعنى إيه إدارة ويعنى إيه مدير وأزاى يقدر يطبق السياسة الحديثة ويستفيد منها وازاى يحط خطه ويعمل دراسة جدوى ، وهذا ما بدأناه للناس التي سترقي للإدارة العليا ،ولكن بدأنا نختار قادة المستقبل ونعد مجموعة تكون قادة المستقبل وانتقينا من الإدارة الوسطة وهي القاعدة الفعالة مساعد إدارة او مدير تنفيذى ، والناس اللي عندهم امكانيات فنية كويسه وبدأت نعملهم برامج إدارية و فنية ولغات لأنه لازم يقدر يتعامل مع العصر الحديث من خلال اللغات وازاى تقدر تستخدم برامج الكمبيوتر بالكامل ، وبدأنا نغير الدورة المستندية دى كلها بدل الورق تكون من خلال الكمبيوتر ،فلازم الراجل ده يبقى مؤهل ، وأخترنا 85 واحد مبدأياً والكورس هيكون سنة او سنة ونصف ومش متواصل...و انا بواجة مشكلة النهارده فى الشركة ان كل الناس دلوقتى عاوزه تروح البرنامج التأهيلى ،وبقيت مشكلة عشان انا مش هقدر استوعب كل الناس ،لأنى عامل ميزانية محدوده للبرنامج ،فشيئ جميل أن الناس بدأت تغير فكرها والناس عرفت عشان تترقى لازم الطريق ده ،فبقيت مشكلة بالنسبالى و الكل بقى عاوز ، وهنبتدي بمراحل ،وأتمنى أن الناس كلها تشارك ، وللأمانة الشباب متحمس جداً لأن عصره كده وكل الشباب فى المرحلة العمرية المتوسطة يمكن الكبار هما الى هيكون عندهم مشكلة ،أنما الشباب متحمسين جداً ، وهذا حفزنى أنى أكمل ، وعندنا 17 منطقة على مستوى مصر فى جميع المحافظات فلازم تربط الناس دى كلها ببعض ، فلو أنا عاوز أخاطب أى محافظة من هنا هيرد عليا سريعاً وهيبعتلى المستندات والتسويات فالدورة هتمشي بسرعة جدا .

• س-هل تطمحون إلى تصدير فكركم لشركات القطاع؟

والله اتمنى ويمكن ربنا كرمنى فى المكان الذي كنت فيه ان هذا النظام كان مطبق ، وكان حلمى لما جيت هنا ان اعمم هذا الفكر هنا وأنهم يتمتعوا بنفس الأمكانيات دى ،والحمد لله ربنا كرمنا وعملنا أستثمار فى العنصر البشرى ، وهذا النظام سينقلنا نقلة كبرى ويجعلنا فى مكانة تانية أمام الشركات كلها ...ثانياً العنصر البشرى هيكون عنده كفأة فى التشغيل و التعلم ويمكن الشركة مش صغيرة وعددها كبير وفيها عمالة زيادة يمكن من بعض الأفكار الى بنعملها تقيم للعنصر البشرى مفيش منشأة هتنجح غير لو كان فى تقيم عادل للعاملة فيها ،لكن عندنا عنا بكل صراحة الكل بيتساوى وكنا عاوزين نعمل مؤشرات الأداء وكل واحد يكون عنده مؤشر او معدلات أداء يتحاسب عليها الى عمل ياخد كل ما يريد والى ما عملش ميخدش شئ ،ولما هيلاقى نفسه هيتعاقب وهيقل غصب عنه هيشتغل ،وعندنا مجموعتين مجموعة مش عاوزة تشتغل هيا القصة كلها أنك عاوز تعمل عملية تدفع الناس تشتغل .

• س-العنصر النسائى فى جاسكو عنصر كبير ما مدى تفاعلهم مع النظام الجديد وكيفية الأستفادة منهم ؟

هو مش كبير ،لكنهن ظاهرين لأنهن متواجدين فى المركز الرئيسى ،لكن عددهم قليل أوى ،أحنا كشركة فنية وكشركة إنتاج القوام هيكون 85% رجال 15% نساء الهدف أنى أزاى استغل الناس دى وأتفاعل معاهم ،قد يكون الفني مشغول لأنه مشغول 24 ساعة تحت الشمس كنت، لكن الإستفادة ستكون من الجميع

أتمنى أن يسلط الإعلام دوره على الإيجابيات لأننا بنتعب علشان البلد دي.

• س-ماذا عن تواجد جاسكو في شركات القطاع ؟

نحن مشاركين فى حوالى 19 شركة ،ولكن بالنسبة للتواجد أحنا مش متواجدين بشكل رسمى معاهم أحنا بس على الحدود بتاعتهم ،هو دورة بينتج ويجهز الغاز وانا ااخذه من حدود المنطقة بتاعتهم ، وانا بساعد فنياً عندما تكون هناك شركات عاوزة تعمل أعمال فنية ، وأنا عندى ناس بتعمل أعمال فنية مثل فحص الخطوط وكافة الاعمال الفنية والشركات بتستفيد بهم.

• س-ماهي آمالك للمستقبل في جاسكو وفي قطاع البترول ؟

نفسي أشوف جاسكو أحسن شركة فى الدنيا ،وأحقق أحلامى فيها وأستثمر العنصر البشرى وارقى مستواها الفنى والإدارى ،ودعاء من القلب للناس أنهم يحبوا شركتهم ويحبو بلادهم من خلال الأخلاص فى العمل والأنتماء وحب العمل ،ونفسي جاسكو تسير وتحقق مشروعاتها التوسعية اللي ماشيين فيها ، وانا شايف أن جاسكو فى نشاط الغاز هي الرائدة والشبكة دايماً عشان متصلة وتحت الأرض بشبهها دايماً بالدورة الدموية ،فهى الدورة الدموية للبلد وفى نفس الوقت النشاط التاني أهميتة ودورة فى مساندة البلد.

• س-هل تجدون مساندة من القطاع لأفكاركم؟

والله هو كل المسئولين الكبار فى قطاع البترول مؤمنين بهذا بالدور ، وهم عليهم أعباء كبيرة من أول الوزير وكل العاملين ، وهم متفاهمين جداً، وعندما حدثت مشكلة أن الناس فى الأول مش عاوزين التدريب فى ناس بعتت شكوى للوزير وقال لي أوعى ترجع أو تقف ، وحسيت أنه راجل متفاعل وكمان المهندس طارق الملا جاى من فكر أجنبى وكان شغال فى شركة أجنبية فهو مؤمن بالفكر ده جداً وانا بقول الله يكون فى عون كافة المسؤلين فى مصر على احمالهم الكبيرة ،إنما من ناحية الإيمان القيادات الموجوده كلها من الصفوة لكن الظروف صعبة .

• س-هل من رسالة تود توجيهها؟

أنا بتمنى أن الإعلام يلعب الدور الصح فى البلد دى فهو قادر أنه يزود الوعي عندهم ويزود روح الإنتماء ويخلى الناس تروح للأتجاه الصح وهو له ادوار كتير جداً ولايد من ان يركز في ما هو فى صالح البلد ، ونفسي التليفزيون المصرى ينهض مره تانية وبنشكرك كصحافة متخصصة لأنكم توجهون الضوء لكل ماهو إيجابي.

 http://www.gasco.ae/ar/pages/index.aspx