مشكلتك مش فيك.. د حنان عبدالمنعم

فيه ناس أول ما تسمع كلمة، أو توصلهم صورة مش على هواهم، يهاجموا! مش علشان عندهم حق، ولا علشان شايفين الحقيقة، لكن لأن اللي شافوه مش متعودين عليه… ببساطة، أنت طلعت مختلف!

في ناس بتبعد عنك مش علشان فيك عيب، لكن علشان فيك ميزة مش قادرين يستوعبوها… فيك طيبة مش متعودين يشوفوها، فيك صدق بيربكهم، وشفافية بتخوفهم.

الصدق عندك مش حركة ولا أسلوب… ده طبع.
مشاعرك مش مؤقتة ولا متصنعة… دي طاقة طالعة من قلب صافي، متربي على النُبل، مش على المصالح.

بس للأسف، مش كل الناس قابلت اللي زيك.
في ناس اتربّت وسط الزيف… وسط ناس بتحسب كل حاجة بالمكسب والخسارة، ناس بتتلوّن على حسب المصلحة. فلما يقابلوك، مش بيصدقوا إن فيه حد لسه بيحب بجد، ويدي من غير مقابل.

أنت مش غلطان، ولا محتاج تغيّر من نفسك.
اللي اتعود على الصحبة الغلط، عمره ما هيعرف قيمة الصح. واللي ما شافش النقاء قبل كده، طبيعي يستغربه… ويمكن يهاجمه.

خليك زي ما أنت…
قلبك النضيف ده مش ضعف، ده ندرة.
وكونك حقيقي في عالم مزيف، دي مش أزمة… ده شرف

خليك دايمًا النور حتى لو حواليك عتمة، وافتكر دايمًا إن القلوب النظيفه مش بتتغير… هي بس بتتعب أوقات، لكن عمرها ما بتنكسر
هون علي نفسك وحب نفسك الناس تحبك