أربعة تكشف أربعة...شيماء محمد

مش كل ضحكة لطافة…
ولا كل قرب إضافة…فيه مواقف لما تدخل حياتك…
تقلع الأقنعة وتعرّي المسافة…

الفقر...مش نقص فلوس…
ده نقص نُفوس…يهزّ العِشرة…ويكشف مين بيحبك شريك، ومين مستنيك رصيد…في الفقر وفاء الزوجة، مش دموع ولا كلام… ده ضهر ما ينكسرش، حتى لو الدنيا مالت، والأيام قست، والحلم نام…الفقر قدام الضهر عدو خايب جبان..

والسفر...مش طريق وسكة… ده غربال رفقة…
فيه اللي يسيبك أول تعب…
وفيه اللي يشيل عنك التعب…
السفر يكشف مين صاحب خطوتك…ومين صاحب خطتك…ومين ماشي جنبك
لحد ما مصلحته تسبقك…
السفر بيعرفك من بيستمتع بصحبتك وينفعك ..ومين ماشى ورا ضلك بس عشان يخدعك.

والمناصب...مش رفعة مقام…ده امتحان ضمير
قدّام الكل…فيه اللي الكرسي يفضحه…وفيه اللي يزوده هيبة ويرفعه…
المناصب تكشف معادن الرجال…يا ذهب يلمع
او نحاس بيخدع..فمعدن الرجال لما يمسكوا المناصب بيبان...

والخصومة…أقسى كشف
وآخر ميزان…لما الخلاف يعلى…القلوب تتكلم
من غير لسان…كلمة زيادة…نية سودا…فرحة في وجعك وسكوت وقت الخذلان… الخصومة تكشف القلوب…رحيمة ولا قاسية…نضيفة ولا محمّلة
بغل قديم، واستسهال للطعن…

وعشان كده…
ما تصدّقش الكلام…
ولا تنخدع بالسلام…
الحقيقة ليها أربع أبواب
لو اتفتحوا…
يقفلوا وهم كتير
ويفضحوا أوهام…

الفقر… والسفر ، والمناصب… والخصومة…
أربعة تكشف أربعة…
واللي يعدّيهم بضمير…
قليل…بس يستاهل العِشرة
والقرب والأمان…