10 أخبار من دبة النملة تعرف عليهم

* كل حضور مؤتمر الموك كانوا مبسوطين بتواجد الاستاذ حسام التوني داخل المؤتمر ، والصراحة وجوده كان فارق لانه اهتم بالحضور وساعد بشكل كبير فى حل اي مشكلة ممكن تواجه اي حد ، حسام التوني قدر يدير المنظومة كويس وخاصةً انه رئيس اللجنة اللوجستية "الخدمية"، وبالفعل قدر يخدم الحضور ، عشان كده نقدر نقوله ونقول لكل المجموعة المحترمة سواء لجنة التعاقدات او العلاقات العامة "سيد القوم خادمهم ".

* تجرى مشاورات داخل الوزارة لنقل رئيس شركة كبرى إما لديوان الوزارة وإما لشركة صغرى حجماً لكنها كبرى عطاءًا وسخاءًا ، حتى يقضي فيها ما تبقى له من فترة خدمة قبل خروجه للتقاعد ، خاصةً والشركة التي يترأسها اصابها ما اصابها ولم تعد لديه قدرة على بذل المزيد فيها .. خلاص اطلع على هناك زود دخلك وحلو كده .

————————————-

ماذا يحدث في تاون جاس؟

————————————
* يوم 17 نوفمبر رئيس شركة بترول ابوقير عبمعز طالع معاش ، والمهندس عبمعز بقاله ييجي 3 سنين واكتر ، وفيه كلام ان قيادة من اسكندرية تعمل بالقاهرة بس هو اسكندراني وعاوز يرجع بلده هو المرشح ، لأن مدير عمليات الشركة الحالي عنده 59 سنة يعني سنة واحدة على المعاش ، والكلام ده مينفعش معانا احنا عاوزين شباب ، الواحد يدخل الشركة وهو 45 يطلع منها وهو 59 .

* فيه كلام كتير اليومين دول عن رئيس شركة محظوظ هيمشي وهييجي مكان واحد تاني عشان يبقى محظوظ برضو ، والحظ بدل ما يحظ واحد يحظ اتنين ، وربنا يحظ الجميع .

* فيه كلام عن تغيير مسئولة الاعلام باحدى الشركات ، لوجود حاجات كتيرة قوي مينفعش تتحل ولا ينفع تتقال دلوقتي ، بس هنقولها كمان شوية .

* فيه 3 قيادات فى الهيئة بيتقال انهم مرشحين يتنقلوا ويسيبوا الهيئة وييجي حد غيرهم ، بس لو عصرنا القطاع مش هنعرف نجيب حد غيرهم ، الا اذا ربنا ادانا هبه من عنده او عوضنا بالخلف الصالح ، بس لما التلاته هيمشوا وفيه حبة حلوين طالعين معاش ، مين بقى اللي هيفضل فى الهيئة ؟؟

* سمعت خير اللهم اجعله خير ان شقيق مسئول كبير مرشح لتولي منصب داخل الهيئة ، وهيتنقل من الشركة ويروح هناك ، ولو عاوز رأيي هو شاطر وهيعرف يدير المكان كويس ، دا زمان كان فيه واحد من نفس الشركة وحقق مكاسب ونجاحات في نفس المكان .

* سمعت ان اعضاء مجلس الادارة من اصحاب الخبرة مرشحين لعضويات تانيه ، ودا لنجاحهم في اماكنهم والادلاء بأراء سليمه وصحيحه احسن من اللي لسه فى الخدمة ، والله فكرة طيبه لان اصحاب الخبرة معندهمش حاجة شغالهم غير التدقيق والتحقيق ودا هيكون افيد للشركات ، فياريت يخلوا العضويات لاصحاب الخبرات .

* مش عارف موظف الامن اللي بيكتب تقارير في كل الناس هيعمل ايه بعد رئيس الشركة ما يمشي ، واللي سايبله الهدوم على الحبل ، يا ترى هتروح معاه ولا هتعمل ايه وخاصةً ان الهيئة عرفت كل مصايبك .

* دلوقتي فيه شركتين لوز اللوز ، ميدتاب ودي فاضيه وشركة ميداليك ، ودي هتفضى كمان كام يوم ، يا ترى مين هيروح هنا ومين هيروح هنا من حبايب كلبي الاتنين المغضوب عليهم !