دبة النملة واللي عامل عمله

••حتى الآن لم تستقر الأمور في البيت الأبيض ، لا حد عارف هيروح فين ولا مين عارف هييجي منين ، البيت منقسم لمجموعات وكل مجموعة على حده ، لكن الأيام الجاية هتثبت مين الأصيل والوفي ومين اللي ما صدق تجيله الفرصة .

———————————

••واضح ان المعركة بدأت بين عنتر ولبلب فى المعادي ، كل ما عنتر يخنق لبلب ، يقوم لبلب يديه قلم ، والموضوع هيستمر لحد عنتر لما يمشي او يتنقل او يفارق الحياة ، لأن لبلب مش هيسيبه غير لما يلسعه 7 اقلام ، والصراحة عنتر كفاية عليه كده ، سيب الساحة لغيرك ، الناس زهقت منك .

————————————-

••الشركات الفاضية ومفيش فيها رئيس ، دا موضوع شاغل الكل ، لكن كل يوم بيعدي والاماكن دي فاضية بتوفر من المصروفات ، ودا مقصود وممنهج ، فمحدش يشغل باله .

———————————

••اللجنة الاستشارية اللي اعلن عنها الوزير ، زيها زي الشركات الشاغرة ، واضح ان الموضوع زيه زيها بالظبط ، ترشيد ترشيد ، مين هيجيب حكما واستشاريين والقطاع بيرشد ترشيد جامد .

———————————

••واضح ان فيه معركة كبيرة فى ادارة الاعلام بالوزارة ، بعد تعيين الدكتور معتز متحدث رسمي ورئيس تحرير لمجلة البترول ، وواضح ان فيه ناس موجودة عاوزه تعمل مشكلة عشان الصحفيين يدخلوا فيها ، لان فيه ناس منهم هيتنقلوا ويرجعوا اماكنهم ، كل الصحفيين ملهمش فى القصة دي ، وبعد شوية هننشر تفاصيل الصراع الدائر على لا شيء .

————————————

••جهة عليا طلبت فحص ملف العربيات في قطاع البترول ، المهم انهم بيفحصوا العربيات المركونة في جراج الوزارة ، اشي مرسيدس على bmw على كاميري على فولكس فاجن على انواع تانية كتير ، طيب العربيات دي بتاعت مين ومين الشركات اللي بعتتها ومين اللي بيستخدموها ، دا موضوعنا القادم ، لازم الترشيد يا جدعان .

——————————

••بعض النواب اشتكوا من ان مرتباتهم قليلة اوي ومش مكفيه لنص الشهر ، ودا صحيح بعد رفع الاسعار ، لكن العملية نسبية ، يعني لما نائب يبقى مرتبه كذا ، ولا بلاش خليها للمرة الجاية عشان انا جبت الدخول الخرافية للنواب .

——————————-

••حتى الآن مفيش اي اخبار عن المسميات الوظيفية للمعاونين الشباب اللي الوزير طلع بيهم حركة ، هل الموضوع مجرد كلام عن تصعيد الشباب ولا الموضوع بحق وحقيقي والشباب دول هيبقى ليهم صلاحيات ؟، واللي انا اعرفه ومتأكد منه ان الدولة العميقة هتقضي عليهم ، عشان كده هتقرح كيفية الاستفادة منهم ، بس المرة الجاية .

——————————-

••سؤال: ايه اللي يخلي اتنين متعينين في يوم واحد ومكان واحد ودور واحد وتخصص واحد ، وبيوحدو الواحد ، كل واحد منهم يقبض أرباحه غير التاني ؟؟ لو عرفتو الإجابة عرفوني !